Í gjárkvøldið varð sjøtil settur á nýggja kappingarárið í donsku superliguni. Tá hittust FC Nordsjælland og FC Vestsjælland í Farum, og heimaliðið vann 3-2, eftir at gestirnir úr Slagelse eina løtu í 1. hálvleiki vóru frammanfyri 2-0.
Næsti dysturin verður klokkan 16 í dag. Meistararnir úr AaB eru á veg úr Aalborg og suður til Haderslev at spæla ímóti SønderjyskE.
Føroyski Gilli Sørensen er á lønarlistanum hjá meistarunum í Aalborg. Gilli er ikki á listanum yvir spælarar, sum seinnapartin skulu royna seg í Haderslev, og hann verður ikki á vøllinum næstu vikurnar. Orsøkin er tann, at Gilli Sørensen fyri stuttum er skurðviðgjørdur fyri skaða í øklinum.
AaB var í síðstu viku á venjingarlegu í Hollandi. Orsaka av skaðanum var Gilli Sørensen ikki við.
