Fríggjadagin 24. september kundi Sosialurin »presentera« nýggja landsstýrið soleiðis, sum tað kom at síggja út. Og snøgga viku seinni var so saman landsstýri veruleiki.
Mánadagur 29. september, á sjálvari Mikkjalsmessu, var so fyrsti arbeiðsdagur hjá nýggja landsstýrinum.
Klokkan tíggju í morgun helt landsstýrið á fyrsta sinni landsstýrisfund undir leiðslu av Kaj Leo Johannesen, løgmanni, og manningin var sjálvsagt øll møtt.
Í morgun, tá Sosialurin var í Tinganesi, var enn ikki greitt, hvar nýggi uttanríkismálaráðharrin, Jørgen Niclasen, hevði sína skrivstovu, men hetta verður korini greitt seinni á degnum. Hann skal hitta síni starvsfólk klokkan tvey seinnapartin, og tá er væntandi greitt, hvussu hølisviðurskiftini hjá Uttanríkismálaráðnum verða.
Tá vit fregnaðust um, hvussu drúgvur hesin fyrsti veruligi landsstýrisfundurin bleiv, var nýggi løgmaðurin okkum svar skyldugur.
Eg havi jú ikki roynt hetta áður, so eg dugi ikki at siga tær, segði Kaj Leo Johannesen.
Fráfarni løgmaðurin, Jóannes Eisdesgaard, visti tó at siga, at fundirnir vanliga vardu um tveir tímar ella so. Altso fram til døgurða.
Helvtin óroynd.
Men tað er kortini ikki bara løgmaður, sum er nýggjur í hesum høpi. Helmingurin av landsstýrisfólkunum hava ikki ella næstan ikki roynt hetta áður.
Johan Dahl sat í 21 dagar sum fiskimálaráðharri í 2003, áðrenn umstøðurnar noyddu hann frá, so tað er avmarkað, hvussu nógvar royndirnar vórðu.
Nýggju kvinnurnar á tingi eru eisini púra óroyndar í landsstýrinum. Rósa Samuelsen skal umsita Almannamál, og hennara skrivstovuhølir verða í fyrrverandi Almanna- og heilsumálaráðnum undir somu lon, sum Hans Pauli Strøm, heilsumálaráðharri.
Eisini Anniks Olsen er nýggj í landspolitikki, og somuleiðis eisini landsstýrinum. Hon er sum kunnugt vorðin innlendismálaráðharri.
Hini fimm eru tó øll roynd í stýri landsins. Jóannes Eidesgaard, Jørgen Niclasen, Hans Pauli Strøm, Helena Dam á Neystabø og partvís Jacob Vestergaard hava fleiri ára royndir í Tinganesi.
Sum nevnt var fyrstu landsstýrisfundur hjá nýggju samgonguni í morgun, og sum skiltist var einasta mál á skránni nevndarbýtið í løgtingsnevndunum, sum eftir ætlan skulu veljast á løgtingsfundinum í morgin.
