Fær Landsjúkrahúsið ikki hægri játtan enn tað, sum samgongan hevur sett av á fíggjarlógini, fer tað at fáa álvarsligar avleiðingar.
Tað staðfestir Allan Skaalum, stjóri á Landssjúkrahúsinum.
Í fjør brúkti Landssjúkrahúsið 342 milliónir krónur og á fíggjarlógini í ár ætlar samgongan at seta 344 milliónir av til Landssjúkrahúsið.
Tað er ein hækking upp á tvær milliónir, ella ein hækking upp á 0,5%.
Samstundis eru útreiðslurnar munandi hækkaðar, bæði lønir og heilivágur.
- Tað er púra greitt, at játtanin í ár fer langt frá at røkka til tað virksemi, vit hava í dag, sigur stjórin.
Samgongan krevur skerjingar
Hann sigur, at Landssjúkrahúsið hevur væl og virðiliga greitt frá, hví tað er neyðugt at hækka játtanina, men tað hevur samgongan so ikki tikið til eftirtektar.
- Svarið frá samgonguni er ein játtan, sum stendur í stað og tað kann ikki merkja annað enn tað, at samgongan krevur av okkum, at vit niðurlaga virksemið á Landssjúkrahúsinum fyri at fáa játtanina at røkka til.
- Øðrvísi kunnu vit ikki skilja boðskapin frá samgonguni og tað fara vit sostatt undir at fyrireika okkum til nú, leggur hann afturat.
Hann veit ikki, hvussu stórar sparingar, tað er neyðugt at seta í verk, tí tað hava tey ikki havt stundir til at rokna út, men fyribils metir hann, at tað verður neyðugt at spara minst 10 milliónir í rakstrinum.
Í hesum sambandi staðfestir hann, at tað verður neyðugt at spara lønir, men um tað verður neyðugt at siga fólki upp, veit hann ikki.
Hann heldur, at tað kanska fer at bera til at skipa vaktir øðrvísi, uttan at hann tó hevur gjørt sær fær um tað.
- Verður hetta endaliga úrslitið, verður í øllum førum ikki pláss fyri øllum teimum lønarútreiðslunum vit hava nú.
Annars verður tað sjálvandi eisini neyðugt at gjøgnumganga allan raksturin fyri at vita um tað ber til at spara onkustaðni.
Tænastur niðurleggjast
Men tað er eisini greitt fyri Allan Skaalum, at sama, hvat tey gera, fer tað undir ongum umstøðum at bera til at halda fram við øllum tí virksemi, sum er á Landssjúkrahúsinum í dag.
- Tað er ongin ivi um, at vit kunnu ikki halda fram við øllum teimum tænastum, vit hava í dag og tí verður tað neyðugt at skerja heilar funktiónir burtur, staðfestir hann.
Hvørjar funktiónir, talan kann vera um, dugir hann ikki at siga enn, tí tað er ein spurningur, sum má takast upp við tær ymsu depilsleiðslurnar og tað skal eisini gerast í samráð við Almanna- og heilsumálaráðið.
- Men tað er í øllum førum greitt, at verður hetta endaliga játtanin, verður tað neyðugt at skerja ymsar funktiónir burtur.
Fyri deyvum oyrum
Allan Skaalum sigur, at tey hava roynt at grundgivið fyri, hví Landssjúkrahúsið hevur tørv á eini størri játtan.
- Vit hava í fleiri ár grundgivið bæði væl og virðiliga fyri, hví játtanin til Landssjúkrahúsið er ov lítil.
- Men úrslitið, sum nú fyriliggur, er ein greið ábending frá samgonguni um, at tað kjakið er av á hesum sinni og so hava vit onki at gera uttan at halda okkum til tað og so er tað væl meiningin, at vit skulu halda upp at gera ymiskt av tí, sum vit gera í dag.
- Øðrvísi kunnu boðini ikki skiljast, leggur hann afturat.
Allan Skaalum staðfestir eisini, at játtanin er eitt vónbrot.
- Sjálvandi veit eg, at tað er tórført at fáa alt at ganga upp, men tað er týðiligt, at hetta følist sum at ganga í mótbrekku, leggur hann afturat.
Les eisini greinina "Hans Pauli dregur revolvaran".
