Sunnudagurin 22. juni verður søguligur í føroyskum fótbólti. Hetta er fyrstu ferð, at eitt føroyskt lið skal spæla altjóða skrásettan dyst á graslíkið.
HB fær um vikuskiftið vitjan av svenska Elfsborg, har fyrsti dysturin í Intertoto-Cup kappingini skal avgreiðast.
Hópurin hjá svenska liðnum telur fleiri dugnaligar leikarar, men føroysku áskoðararnir mugu verða fýra av teimum fyri uttan. Anders Svensson og Johan Wiland vóru við í svenska landsliðshópinum, sum takkaði fyri seg í EM-endaspælinum í gjár, og eru tískil ikki við í Føroyum. Jari Ilola, finskur landsliðsleikari, er ikki tøkur, og heldur ikki Fredrik Berglund, sum fyri árum síðan skjeyt eina rúgvu av málum í Esbjerg, er við.
Magnus Hauglund, venjari, og Petter Wettergren vóru í Føroyum og eygleiddu HB, tá hesir vitjaðu á Sandi fyri góðum tveimum vikum síðan.
- Vit verða noyddir at stríðast, um vit skulu vinna okkum víðari. Men vit eiga sjálvandi at enda omaná, sigur Peter Wettergren í stuttari viðmerking við heimasíðuna hjá Elfsborg.
