Næmingarnir í 1. flokki í Kommunuskúlanum í Havn vóru spentir í morgun, tá stóru kassarnir stóðu í durinum. Eins og undanfarin ár fáa landsins 1. flokkar súkkluhjálm, og í morgun fingu børn í Kommunuskúlanum í Havn Hjálm..
Børnini vóru hugagóð, tá Ferðslutrygd greiddi teimum frá um hjálmarnar, og hví hann er umráðandi at brúka, tá vit súkkla, standa á rulluskoytum ella á rennihjóli. Fleiri søgdu søgur um, tá tey høvdu brotið arm, fingur ella bein, at tá bar til at fáa tað í rættlag. Verri er, um høvdið tekur í, tí tá kann vera verri at bøta, sigur Ferðslutrygd.
Í skáanum í morgun vóru næmingarnir ein túr í grøna skúlagarðinum og royndu súkkluhjálmarnar.
Ávirkan á skaðar á høvur
Súkkluhjálmur kann ikki fyribyrgja at óhapp koma fyri, eins og hann ikki kann byrgja fyri øllum skaðum á høvdið. Men ert tú óheppin, og dettur av súkkluni, minkar vandi fyri skaðar á skalla, høvd og heila við upp í 50 %.
Hvussu virkar súkkluhjálmur?
Súkkluhjálmur virkar í fyrra lagi við at forða, at hvassir lutir, so sum steinar ellar hvassir lutir á súkkluni, sleppa gjøgnum húðina ella skallan. Í øðrum lagi javnar hjálmurin stoytin móti høvdinum yvir eina størri flatu. Hetta kann minka ella forða skaða á heila og skalla.
Tað eru Ráðið fyri Ferðslutrygd í samstarvi við Tryggingarfelagið Føroyar og Trygd, sum lata 1. floksnæmingunum hjálmar.
