Fiskivinna
Mánadagin landaðu sørvingar partrolararnar, Vesturskin og Vesturvarða, sum høvdu 290.000 pund av upsa. Hetta er ein av bestu túrum hjá skipunum í eitt hálvt ár ella so.
Línuskipið Eystnes landaði eisini í Sørvági mánadagin. Teir høvdu 26.000 pund, sum teir fingu á trimum setum. Eystnes breyt túrin av fyri at fáa hampiligan prís, og sum skilst, vóru teir nøgdir við søluna.
Í morgin landa línuskipini Venus og Vesturhavið í Sørvági, og teir hava umleið 70.000 pund hvør.
Venus byrjaði fiskiskap 14. november og Vesturhavið 17. november, so skipini hava havt millum sjey og tíggju setur í part.
Væl av útróðrarfiski kemur eisini upp á land í Sørvági, og hesa vikuna hava størru útróðrarbátarnir, Líðhamar, Kallanes og Líraberg ligið um 8.000 pund á setuna. Teir seta einar 60 stampar hvørja ferð.
Í Sørvági hevur soleiðis verið nógv landing hesa vikuna, siga tey á landingarmiðstøðini har vesturi.
