Hvønn fríggjadag savnar norska heimasíðan iLaks spottprísir fyri laks. Talan er um fisk, sum skal leverast ta komandi vikuna. Heimasíðan setir seg í samband við fleiri lið í virðisketuni, eitt nú alarar, útflytarar og keyparar.
- Marknaðurin er tungur. Tað er eingin loyna. Trupulleikin er, at tað er bara ídnaðurin, sum keypir. Feskfiskamarknaðurin er burtur, sigur ein útflytari við iLaks.
Útflytarin vísir á, at laksaprísurin hesar næstu dagarnar fer at liggja millum 25 og stívliga 27 danskar krónur fyri kilo - alt eftir stødd. - Tað mesta, tú fært, er stívliga 29 danskar krónur fyri kilo. Stórlaksurin er hin truplasti.
- Vit keypa ikki meira inn enn vit skulu. Vit hava ikki óseldan fisk. Viðskiftafeløg siga, at tey vilja ikki hava so nógvan fisk framyvir, sigur útflytari við iLaks.
Heimasíðan leggur aftrat, at við hesum er laksaprísurin bert helmingin av tí, hann var í byrjanini av hesum árinum.
- So lágur hevur laksaprísurin ikki verið í ár. Viðskiftafeløg hava tað, tey skulu hava. Hvat skulu vit gera? Marknaðurin er ógvuliga avmarkaður. Tað eru handilsketur, sum skulu keypa fløk til jólar.
Lagt verður aftrat, at feskfiskadiskarnir eru stongdir, og tí er talan bara um frystar vørur, sum handilsketurnar keypa og selja.
- Jólasølan er avlýst - fyri at siga tað, sum tað er. Eg trúgvi ikki, at marknaðurin letur seg upp aftur fyrr enn næsta summar. Men, vit eru her, og vit eru á lívi. Vit hava havt nøkur góð ár, og vit tola eitt sindur, sigur laksaútflytarin við iLaks.
