Ólafur Stefánsson, sum verður hildin vera tann besti hondbóltsspælarin, sum íslendingar nakrantíð hava átt, hevur nú gjørt av at gevast á íslendska landsliðnum.
Í vikuni vóru 20 ár, síðani Ólafur spældi sín fyrsta landsdyst, og síðani hevur hann spælt 329 landsdystir og skotið 1.562 mál fyri landsliðið. Tey bestu avrikini í landsliðshøpi vóru í 2008 og 2010, tá Ísland vann ávikavist olympiskt silvur og EM-bronsu.
Ólafur Stefánsson spældi seinast við danska felagnum AG København, men hann hevur ikki gjørt sáttmála við nakað felag, síðani tað danska felagið fór á húsagang í summar.
Ólafur Stefánsson er 39 ára gamal.
