Læknahúsini í Fuglafirði eru umbygd til dagtilhald fyri minnisveik. Í hesum sambandi varð skipað fyri móttøku í gjár, tá ið dagtilhaldið alment verður tikið í nýtslu.
Dagtilhaldið er fyri fólk í Eysturoynni, sum hava eina byrjandi demenssjúku og letur upp í gomlu doktarahúsunum í Fuglafirði, stendur at lesa á heimasíðuni hjá Fuglafjaðar kommunu. Pláss verður fyri 10 fólkum.
Sonni á Horni, borgarstjóri bjóðaði vælkomin og treiv í søguna. Fram til 1946 tá ið Jacob Højgaard kom, hevði Fuglafjørður havt lækna saman við Klaksvík. Hann greiddi frá, at læknahúsini vórðu bygd í 1948 fyri kr. 150.000,-.
Emma Winther, kom í 1955 og helt fram sum lækni heilt fram til 1980. Eftirmaður hennara var Pól Johannes í Horni, sum legði frá sær í oktober 2007.
Annika Olsen, landsstýriskvinna í Almannamálum fegnaðirt um verkætlanina at skipa húsið sum dagtilhald fyri minnisveik og takkaði verandi býráði og undanfarna býráði fyri væla arbeiði at fáa hesa verkætlan framda í verki undir snotisligum kørmum.
Hallur Thomsen, depilsstjóri á Menningardeplinum í Almannaverkinum helt røðu og fegnaðist um hetta nýggja tilboðið fyri eldri.
Sigga Óladóttir Joensen, forkvinna í Sosialu nevnd Fuglafjarðar býráðs helt røðu og handaði Annika Olsen, landsstýriskvinnu lykilin til dagtilhaldið, sum nú hevur raksturin um hendi.
Ása Hanusson, økisleiðari hjá Heimatænastuni í Eysturoynni takkaði fyri víðkaðu møguleikarnar hetta tilboðið veitir teimum gomlu og avvarandi teirra.
Bárður á Lakjuni sang og spældi tvey løg og felagssangir vóru eisini á skránni – Dávur Winther, sum er vaksin upp í læknahúsunum í Fuglafirði, bar kvøðu frá mammuni, Emmu Winther, sum var lækni í Fuglafirði í meir enn 25 ár og hugleiddi yvir gomul minnir úr Fugafirði og úr húsunum annars. Húsini eru varðveitt í upprunaliga sniðinum við nógvum áhugaverdum gomlum myndum úr Fuglafirði á veggunum.
Væl av fólk var komið saman at fegnast saman við Almannamálaráðnum og býráðnum og øllum teimum , sum koma at varða av húsinum, sum nú skal vara karmur um dagtilhald fyri minnisveik í Eysturoy.
Orð og myndir: Dávur Winther
Fleiri myndir síggjast í myndatema VIÐ AT TRÝSTA HER
