Í dag varð danski rapparin L.O.C dømdur 40 dagar treytaða fongsulsrevsing, orsaka av einum harðskapsmáli. Men eftir øllum at døma broytir tað ikki sendingina The Voice, sum L.O.C. er dómari í hvønn leygardag á TV2.
Hóast treytaðu fongsulsrevsingina, sum L.O.C. fekk í dag orsaka av einum harðskapsmáli, so ætlar Tv2 at halda fram við rapparanum í sendingini The Voice.
- Vit taka frástøðu frá hendingini, sum var á festivalinum Rock Under Broen í summar, og vit hava ikki vitað av, at hetta málið var ávegis, sigur Keld Reinicke, sum er stjóri fyri undirhaldsútvikling á Tv2.
- Tað eru einans tríggjar sendingar av The Voice eftir, og vit hava eina skyldu mótvegis hyggjarunum og ikki minst luttkarunum, sum hava arbeitt hart seinastu tíðina. Liam O'Conner hevur í dag fingið sína revsing, og vit ynskja ikki, at koyra hann úr sendingini, tí vit meta, at kappingin ikki verður rættvís, um hann verður koyrdur úr nú, sigur hann.
Hetta veit heimasíðan hjá BT í dag.
