Á Facebook 22. august 2012 skrivar løgmaður m. a. soleiðis:
»Blaðstjórin á Sosialinum heldur áfram við sínum ósannindum um hvat løgmaður skal hava sagt og ikki, og hann er nú eisini lopin á blaðstjóran á Dimmalætting, hví hann ikki eisini, er farin at steina og lúgva uppá løgmann. Eirikur kann ikki heilt seriøst samanbera seg sjálvan og sítt trúðvirði við blaðstjóran á Dimmalætting, tað hevur hann slett ikki standard til, Dimma hevur nú einaferð eitt nógv størri trúðvirði, enn blaðstjórin á Sosialinum nakrantíð hevur havt.«
Spola vit so tíðina presis eitt ár aftur til 22. august 2011, so hevur løgmaður knapt so stórt álit á blaðstjóra á Dimmalætting, sum hann ringir til seint á kvøldi og skeldar og skrálar í telefonini. Vit endurgeva blaðstjóran á Dimmalætting:
»Klokkan er júst farin av 23.00. Tað er mánakvøld 22. august 2011. 20 minuttir eru farnir, síðani ein hvítgløðandi løgmaður var í telefonini.
– Eg tosi aldrin, aldrin, ALDRIN aftur við teg!, hevði hann geylað til endans. Og legði so endaliga afturat:
– FARVÆL!«
Og blaðstjórin á Dimmalætting greiðir víðari frá, hvussu løgmaður leikar í, og endurgevur løgmann:
» – At ein so royndur journalistur sum tú kanst fáa teg at skriva eina sovorðna grein! Og forsíðan!! Handan forbannaða myndin, sum er tikin ...eg veit ikki hvar... tit útstilla meg sum ein gemenan forbrydara!! Á forsíðuni!! Dimmalætting er blivin nakað so ófatiliga vánalig. Tað eri ikki bara eg, sum haldi tað. Nógv – heilt nógv – siga tað sama!«
Spurningurin er so, hvør er verri, Dimmalætting ella Sosialurin (ella løgmaður?). Bæði bløðini hava traðkað løgmann og tærnar – við at hava skrivað um viðurskifti, sum honum ikki dámar.
Løgmaður heldur so, at tað ger bløðini vánalig...
