ALS
Soleiðis sum lógin á ALS er í løtuni, er tað ólógligt at geva fiskimonnum betri sømdir í arbeiðsloysisskipanini.
Tað staðfestir ein løgfrøðilig niðurstøða, sigur nevndarformaðurin í ALS, Alfred Petersen.
Tað hevur mangan verið frammi, at fiskimenn hava alt ov vánaligar sømdir í arbeiðsloysisskipanini.
Tað seinasta, sum er hent í hesum sambandi, er, at Løgtingið samtykti í vár at heita á Landsstýrismannin í vinnumálum, Bjarna Djurholm, um at virka fyri at finna eina loysn, so at virka fyri, at finna eina loysn upp á trupulleikarnar hjá fiskimonnum, so at teir kunnu fáa útgjald frá ALS, tá skip teirra liggur.
- Men hetta ber ikki til, soleiðis sum støðan er nú, tí tað er í stríð við lógina, sigur nevndarformaðurin í ALS.
Niðurstøðan er greið
Hann sigur, at í sambandi við samtyktina í Løgtinginum í vár, varð løgfrøðingurin hjá ALS biðin um at gera eina løgfrøðiliga niðurstøðu í málinum.
- Og niðurstøðan hjá honum er púra greið: Soleiðis sum lógin í ALS er nú, er ikki heimild til at gera eina skipan, sum gevur fiskimonnum betri sømdir í ALS, sigur Alfred Petersen.
Hann vísir á, at sum er, eru fiskimenn í ALS sum er og fáa útgjald úr skipanini, tá ið teir verða uppsagdir og eru tøkir á arbeiðsmarknaðinum og sostatt eisini kunnu átaka sær eitthvørt arbeiði, sum ALS ávísir teimum.
Men sum lógin er orðað nú, ber ikki til at gera eina serliga skipan fyri fiskimenn, sum ger, at teir eisini kunnu fáa útgjald, tá ið skipið hjá teimum av onkrari orsøk verður lagt í eina tíð.
Í hesum sambandi verður eisini víst á, at tá ið ein serlig skipan skuldi gerast fyri fiskafólk á landi, mátti lógarbroyting til.
Og tað sama er galdandi, skal ein serlig skipan gerast fyri fiskimenn, staðfestir løgfrøðingurin hjá ALS.
Alfred Petersen sigur, at stýrið fyri ALS hevur tikið niðurstøðuna hjá løgfrøðinginum til eftirtektar og hevur sent svarið víðari til Vinnumálaráðið.
