Kyndil tók týðandi fet

Tað var oddabrak í Hvonndeildini í kvøld, tá ið tað ósigraða oddaliðið, VÍF, var á vitjan hjá Kyndli í høllini á Hálsi í Havn. Talan var um útsettan dyst, sum í novembur varð útsettur vegna veður.

Kyndil legði betur frá landi og var miðskeiðis í fyrra hálvleiki á odda 12-6, men VÍF fekk strítt seg innaftur í hesum málríka fyrra hálvleikinum, sum endaði við, at Kyndil einans var á odda við einum máli, nevniliga 17-16.

Seinni hálvleikur var rímiliga javnur, og VÍF fekk fyrsta gloppið tá ið tær løgdu seg á odda 25-23. Ímóti dystarenda var heimaliðið tó stinnari, og tað endaði við, at Kyndil vann hendan spennandi oddadystin 32-29.

Hetta var sera kærkomin sigur hjá Kyndli, sum nú hevur annað beinið í FM-finaluni. Tær hava vunnið oddasessin frá VÍF, sum í kvøld tapti sín fyrsta dyst í hesum kappingarárinum. VÍF hevur tó spælt ein dyst færri.

Tað vóru stórskjúttarnir á liðunum báðum, Anna A. Brimnes hjá Kyndli og Liljan Djurhuus hjá VÍF, sum gingu á odda við málskjótingini. Tær skutu ávikavist níggju og átta mál.