Hondbóltur ? kvinnur
Tað varð ikki roknað við, at Kyndil fór at geva Stjørnuni stórvegis av mótstøðu, tá liðini bæði hittust í Klaksvík sunnudagin. Stjørnan hevur mest sum alt árið verið á beinari silvurkós, og hóast kumpassið hevur svikið nakað seinastu tíðina, so mundi tað tó vera somikið brúkbart, at tað ikki skuldi bilað, tá Kyndil stóð hinumegin miðlinjuna.
Kyndil hevur nevnliga fram um hini liðini í kvinnudeildini verið stóra vónbrotið í vetur. Gaman í hevði fáur roknað við, at liðið skuldi blanda seg upp í oddastríðið, men leikarahópurin tóktist í øllum førum somikið sterkur á pappírinum, at talan neyvan skuldi gerast um nakran vanda fyri at missa sætið í deildini.
Viljin var við
Tað er tó júst tað, sum vandi er fyri í løtuni. Fyrst og fremst av teirri orsøk, at liðið í alt ov lítlan mun hevur sýnt nakran vilja at vinna tøttu dystirnar. Fleiri ferðir hevur annars verið heilt nær við, og ein stórsigur á VB fyri jól boðaði eisini frá, hvørji evni liðið veruliga hevur, men so er eisini alt sagt. Aðrar dystir hava leikararnir til tíðir verið líkasælir, og tá tær so eisini hava tapt fyri StÍF og Sóljuni, var liðið á botnsessinum undan dystinum í Klaksvík.
Tað eru tær tó ikki í dag, tí tað eydnaðist nevnliga Kyndli at fáa stig við sær úr Klaksvík, og tað kann ikki metast sum annað enn ein sensatión av teimum heilt stóru. Móti einum Stjørnu-liði, sum var nakað skert, við tað at Joan M. Joensen var burturstødd, eins og Adrijana Milodanovic enn ikki er tøk, fann Kyndil stríðsviljan, sum tær hava leitað eftir so leingi, og fekk Stjørnan veruliga ein harðan dyst.
Mundi gloppið
Fyrra hálvleik var Kyndil eisini við yvirlutan fyri tað mesta. Í verjuni stríddust tær væl, og hóast Fríða Petersen var hálvgum skadd, so megnaði hon væl at standa ímóti, tá skot vórðu latin av móti málinum.
Í álopspartinum gekst eisini so hampuliga væl. Stríðsviljin, sum eyðkendi verjupartin, viðførdi í øllum førum, at leikararnir ikki bara steðgaðu uttan víðari, og eitt nú mundi Marjun Tróndarson spæla sín besta dyst fyri Kyndil higartil.
Í seinna hálvleiki helt javna dystargongdin fram. Hvørgin parturin megnaði at skræða seg leysan, men so tóktist orkan hjá Kyndli at vera uppi. Innan tríggjar minuttir miðskeiðis í hálvleikinum fekk Stjørnan fýra mál á rað, og so tóktist alt at enda sum vant.
Hetta skuldi tó ikki verða dagurin, har Kyndil bara gav upp. Hesi fýra málini hjá Stjørnuni komu mest sum øll eftir bólttap hjá Kyndli og eftirfylgjandi kontra, men brádliga fingu tær aftur skil á. Seinastu 12 minuttirnar megnaðu tær at halda málinum fullkomuliga reint, og í seinasta minuttinum eydnaðist teimum at toga seg upp á javnt. Tað var tó um reppið, at Stjørnan kortini streyk avstað við sigrinum. Tíggju sekund fyri leiklok skeyt Simona tríggja-metra kast á stongina. Stjørnan fekk fatur á returinum og vann sær enn eina seinastu roynd, men hesa ferðina smekkaði litavin til á tvørtræið.
Risa týdningur
Fyri støðuna á talvuni merkti eina stigið hjá Kyndli, at tær ikki longur eru niðasta liðið á talvuni. Tað er tó framvegis neyðugt hjá teimum við sigri á Sóljuni, um bjargingin skal verða veruleiki, so í so máta var talan ikki um nakað avgerandi stig.
Hinvegin kann sálarligi týdningurin av sigrinum neyvan undirmetast. Alt ov ofta hevur Kyndil í ár mist stig, tí leikararnir ikki hava havt nóg storan vilja at vunnið. Hesa ferð stríddust tær allar sum ein, og at tað hesu ferð gav úrslit, er ivaleyst nakað, sum tær kunnu nýta í fyrireikingunum til komandi dystirnar.
Fyri Stjørnuna var dysturin kanska enn eitt dømi um, at liðið meira ella minni er uppsteðgað í løtuni. Simona spælir við hálvari ferð og skal helst skurðviðgerast eftir kappingina. Adrijana er framvegis ikki tøk, og nú Joan var burturi, gjørdist tað kanska ov nógv.
Eftir at liðið í allan vetur hevur verið á silvurkós, er nú veruligur vandi fyri, at tær standa við ongum, tá árið er liðugt, men enn kunnu tær tó sjálvar gera hetta av. Kravið, um nakað skal spyrjast burturúr, er tó sera einfalt. Fyri bronsuna skulu tær basa VB í Vági, og skal silvurið kortini gerast veruleiki, verður eisini neyðugt við sigri í Havn móti Neistanum. Tað kann røkkast, men so skal Stjørnan finna munandni betri spæl fram, enn tær hava gjørt seinastu dystirnar, og ikki minst skal orkan eisini fáast longur upp. Onnur frágreiðing finst valla til, at tær nú tvær ferðir í slag hava verið fullkomuliga mál-leysar seinastu 10 minuttirnar av einum heimadysti.
Dysturin í tølum
Stjørnan-Kyndil 20-20 (9-8)
Málskjúttar:
Stjørnan: Simona Dziugyte 8(2), Una Olsen 4, Anna Kristina Samson 4, Bára Skaale 2, BEinta Klakstein 1, Jastrid Gullaksen 1
Kyndil: Lotte Sørensen 7(3), Marjun Tróndarson 4, Palma Petersen 4, Annika Ljósstein 3, Ann Mari Wang 1, Anja Johansen 1
Brotskøst: Stjørnan 2, Kyndil 3
Útvísingar: Stjørnan 1, Kyndil 1
Dómarar úr KÍF: Jákup Dam & Vagnur Johansen.
