Kyndil í hálvfinaluni eftir greiðan sigur á Skála

Faxe Kondi-kappingin, Menn:

StÍF - Kyndil 19-24

Les alt um steypahondbólt í Ítrottarsosialinum mánadagin

Samrøður og samanumtøka frá FM1 kunnu hoyrast á in.fo um eina løtu

StÍF hevði í dag tørv á at vinna við minst fýra málum ímóti Kyndil, um tað skuldi eydnast at spæla seg í hálvfinaluna í ársins steypakapping.

Men frá byrjan bendi dysturin á, at tað fór at vera trupult at skjóta mál á Skála í kvøld. Kanska eisini orsakað av, at StÍF var uttan toppskjúttan, Ivan Mrdalo, meðan toppskjúttin hjá Kyndli, Hjalti Mohr Jacobsen ikki tóktist til reiðar at spæla - Hann kom heldur ongantíð kom á vøllin.

Enn størri ábending var tað, tá ið Tórður Guttesen í Kyndilsmálinum byrjaði dystin við einari brotskastsbjarging. Hann endaði dystin við trimum.

Yvirhøvur høvdu Tórður og Kyndilsverjan um endan í kvøld, og syrgdi so við og við fyri, at Kyndil kundi byggja sær ein góðan mun.

Eftir hálvleiksstøðuna 11-10 til Kyndil, hevði StÍF tørv á ḿálum -  men tey komu ikki.

Eftir einar 13 minuttir av seinna hálvleiki hevði StÍF bert fingið tvey mál, og Kyndil hevði økt upp í 17-12.

StÍF royndi seg við sera álopssinnaðari verju, sum leyp hvøkk á Kyndil eina løtu. Høllin á Skála kendi á sær, at møguleikin var til enn - Men bjargingar frá Tórði Guttesen og mistir bóltar í skjótálopunum hjá StÍF forðaði fyri, at veruligur spenningur kom í dystin.

Nærri enn trý mál kom StÍF ikki, og seinastu løtuna kundi Kyndil í staðin økja upp í dystarúrslitið 24-19.

Kyndil er harvið í hálvfinaluni sum fremsta liðið í bólki 2. Mótstøðuliðið í hálvfinaluni verður næstfremsta liðið í bólki 1.

H71 og VÍF spæla um fremstu plássini í morgin klokkan 16.00

StÍF hevur enn ein møguleika at fáa umboðan í ársins hálvfinalum í Faxe Kondi-kappingini.

Kvinnuliðini hjá H71 og StÍF hittast í morgin klokkan 14.00 í beinleiðis dysti um at sleppa í hálvfinalurnar.

Støðan í Faxe Kondi-kappingini hjá monnum (hsf.fo):

Bólkur 1

Bólkur 2