Smiðjan í Lítluvík er í hesum døgum karmur um eina sera fjølbroytta listaframsýning, har tað serliga er ein røð av kvinnuskulpturum, ið stjala uppmerksemi.
Lívsmyndir
Liggjandi, dansandi, sitandi, hangandi ella hyggjandi út gjøgnum sprossavindeyguni ...
Kvinnuskulpturar í øllum sniðum og støðum seta sín sermerkta dám á framsýning hjá teimum fýra listakvinnunum Mary Strøm, Elsu Zachariassen, Susanne Hansen og Birgit Kirke í Smiðjuni í Lítluvík hesar dagarnar.
Skulpturarnir eru gjørdir úr endurnýtslutilfari og eru sonevndar lívsmyndir, sambært listakvinnunum.
Harumframt hava tær fýra listakvinnurnar eisini eina røð av abstraktum og naturalistiskum málningum við á framsýningini, har arbeitt er við formi og strukturi í akryl.
Hetta er fyrstu ferð tær fýra listakvinnurnar, sum allar búgva í Danmark, hava felags framsýning í Føroyum.
- Tað følist næstan sum at vera til próvtøku, tí vit kenna jú tey flestu, sum koma at vitja framsýningina. Hinvegin er tað óføra stuttligt at hitta fólk, tú kennir, aftur og hoyra teirra hugsan um framsýningina, sigur Mary Strøm.
Tær fýra listakvinnurnar hava leingi arbeitt saman og hittast javnan at leita sær íblástur frá hvørji aðrari.
Framsýningin í Smiðjuni er opin frá klokkan 12 til 18 fram til 22. juli
