Tað grettir ikki, at føroysku flogbóltskvinnurnar standa seg væl á Oyggjaleikunum, og enda altíð í finaluni. Ætlanin er eisini at koma so langt hesa ferð, men millum kvinnurnar og gullið standa nógvir dystir hesa komandi vikuna.
Ein av teimum, ið mangan hevur verið við til at vunnið, er Helen á Lakjuni, ið fegnaðist um fyrsta dystin í gjárkvøldið, sum endaði við væntaða 3-0 sigrinum á liðnum frá norsku oynni Hitra.
– Vit høvdu roknað við at vunnið, og hetta bleiv eisini ein lættur dystur. Tað var eisini fínt, at allar sluppu at spæla, so hetta var ein fínur dystur hjá okkum at byrja við, segði Helen á Lakjuni.
– Eg haldi, at vit við hesum eru komnar væl í gongd. At vit vunnu sannførandi, hevur nógv at siga, tí vit hava ikki spælt so nógv saman.
Ein góð byrjan
Talan gjørdist ikki um nakran drúgvan dyst, tí í effektivari tíð vardi hann 59 minuttir. Í fyrsta settinum var stórur munur, tá Hitra bara fekk sjey stig, men í teimum báðum seinni komu norsku kvinnurnar betur við, uttan tó at megna at hótta av álvara.
– Eg eri ótrúliga væl nøgdur, tí hetta var ein góður máti at koma í gongd uppá. Men so skal eisini sigast, at Hitra hevur tikið seg nógv fram og millum annað hevur ein spælara, sum er í Vordingborg í Danmark og spælir. So har er avgjørt framgongd í hjá teimum, segði Kristian Mikkelsen, ið fegin vildi lata allar sleppa at spæla í gjárkvøldið.
– Vit skulu ígjøgnum so nógvar dystir hesa vikuna, at brúk verður fyri øllum. Genturnar spældu ótrúliga væl, og vit kunnu bara fegnast um kapping á so at siga øllum plássum.
Kvinnurnar skulu í kvøld klokkan 20.15 spæla ímóti Álandi, sum saman við Bermuda kann gerast ein avbjóðari í okkara bólki, eins og Gotland møguliga eisini er tað, meðan Gibraltar neyvan hevur stórvegis at bjóða. Í hinum bólkinum bendir alt á, at Saaremaa og Menorca eru tey mest spennandi liðini, ið liggja framvið at fara allan vegin.
