Ein kvinna, sum starvast á svensku sendistovuni í Izmir í Turkalandi, er í dag rakt av skotum.
Tað skrivar turkiska sjónvarpsrásin, Haberturk. Kvinnan, sum er turkiskur ríkisborgari, hevur fingið álvarsligan skaða.
Sambært rásini møtti brotsmaðurin upp á sendistovuni í sambandi við umsókn um visum.
Upplýsingarnir eru ikki váttaðir av almennum myndugleikum.
Seinastu tíðina hava eina røð av koran-brenningum verið bæði í Svøríki og Danmark.
Hetta hevur eitt nú ført til mótmælistiltøk og fordøming í muslimska heiminum.
Felagsskapurin fyri islamiskum samstarvi, styttur OIC, hevur eisini fordømt koran-brenningar.
Sambært Haberturk er tann, sum verður hildin at vera brotsmaðurin, handtikin.
Kvinnan á sendistovuni varð rakt í bringu og bein, og sambært turkiskum miðlum er kvinnan álvarsliga løstað.
Sagt verður, at brotsmaðurin skeyt, tá hann ikki fekk tað svar á sendistovuni, sum hann ynskti sær.
Fyribils er ógreitt, um hendingin á svensku sendistovuni í Izmir hevur nakað við koran-brenning at gera.
