Narkotika
Teir fýra menninir í Føroyum og tann eini danin í Danmark kunnu vænta sær harðan straf, um ákæra verður reist móti teimum og teir verða funni sekir.
Teir eru higartil skuldsettir eftir straffilógini. Talan er størri mongdir av dusandi rúsevnum, og hetta kann væl hugsast at geva harðan straf.
Hetta verður grundað á eitt rundskriv, sum Rigsadvokaten sendi út í 1991, har umstøður líknandi teimum skuldsetingunum hjá teimum fimm monnunum kunnu metast eftir teirri harðuru revsurammuni í straffilógini.
Tilsamans vórðu níggju mans handtiknir eftir umfatandi húsarannsóknir. Átta eru búsitandi í Havn og ein í Klaksvík. Ein dani er harumframt handtikin í Keypmannahavn. Sostatt vórðu tilsamans tíggju mans handtiknir.
Ein 33 ára gamal maður er skuldsettur fyri at hava tikið ímóti 2,5 kg av rúsandi evnum, sum eru ætlað til sølu. Hetta er farið fram í tíðarskeiðnum frá august til oktober í 2001. Harumframt er hann skuldsettur fyri at hava smuglað 500 gramm av hassji tann 8. desember í fjør.
Maðurin noktar seg sekan í at hava havt 2,5 kilo av hassji við sølu fyri eygað. Hann játtar seg hinvegin sekan í at hava smuglað tey 500 grammini. Maðurin er varðhaldsfongslaður í fýra vikur, har hann er avbyrgdur í tvær vikur, og hann tók ímóti dóminum.
Ein 29 ára gamal maður er skuldsettur fyri at hava tikið ímóti ávísari nøgd av rúsandi evnum við sølu fyri eygað í tíðarskeiðnum frá juli til oktober í fjør. Í øðrum lagi er hann skuldsettur fyri at hava havt 46 gramm av hassji uppi á sær, og hesum játtaði hann seg sekan í. Hann noktaði seg hinvegin sekan í at hava selt rúsandi evni. Hesin varð leyslatin beinanvegin, tí hann ikki hevði ávirkan á kanningarnar hjá løgregluni.
Ein 27 ára gamal maður er skuldsettur fyri at hava goymt og selt hassj, amfetamin og kokain í tíðarskeiðnum frá mei til oktober í fjør. Hesin noktar seg sekan í øllum. Dómarin gav honum varðhaldsfongsling í fýra vikur, men hann hevur skotið henda dómin inn fyri Landsrættin.
Ein 29 ára gamal maður er skuldsettur fyri at hava smuglað hassj og kokain til landið við sølu fyri eygað. Hann játtaði seg sekan í hesum ákærum.
Ein maður verður nevndur í øllum ákærunum. Hann verður mettur at vera ein av høvuðsmonnunum í skipaðu smuglingini. Tað er ein 35 ára gamal dani, ið er búsitandi í Føroyum. Hann var tann seinasti, ið varð avhoyrdur í rættinum hósdagin.
Hann er skuldsettur fyri at hava smuglað og selt rúsandi evni í Føroyum ígjøgnum fleiri ár. Talan er serliga um hassj og kokain. Løgreglan vil vera við, at hann hevur skipað fyri sølu áljóðandi yvir eina millión krónur. Maðurin noktar seg sekan í øllum hesum ákærum. Hann varð varðhaldsfongslaður í fýra vikur, og í tvær vikur er hann avbyrgdur.
Ein dani hevur í sambandi við hetta málið verið til grundlógaravhoyring í Keypmannahavn. Hann varð varðhaldsfongslaður í trettan dagar.
Løgreglan væntar at gera fleiri handtøkur í sambandi við hetta stóra átakið móti narkotika í Føroyum.
