Heimsheilsustovnurin WHO er bjartskygdur um bardagan ímóti eyðkvæmi. Í einari nýggjari frágreiðing skrivar stovnurin, at útrokningar vísa, at tað ber til at vinna bardagan - á pappírinum í hvussu er. Í frágreiðingini, sum er prentað í teirri seinastu útgávuni av tíðarritinum The Lancet, vilja leiðandi granskarar vera við, at tað ber til at útrudda HIV-virusið innan tíggju ár.
Frágreiðingin byggir á royndir í Suðurafrika og Malawi, har læknar hava kannað fólk á hvørjum ári og givið teimum, sum vístu seg at hava smittuna, heilivág. Hetta saman við øðrum átøkum so sum upplýsing um fyribyrging hevur gjørt, at talið á nýggjum HIV-tilburðum er minkað 95 prosent tey seinastu 10 árini.
WHO sigur, at verður framferðin í Suðurafrika og Malawi brúkt um allan heimin, verður talið á teimum, sum doyggja av eyðkvæmi, minni enn fýra milliónir um árið innan 2050. Í løtuni er talið 8,7 milliónir.
Men hesi átøk eru dýr. WHO sigur, at skal sama framferð brúkast um allan heimin, verður kostnaðurin knappar 25 milliardir krónur um árið.
