Hóast Skansanes rendi á land í Storfjorden í Noreg, slapp skipið væl frá hendingini.
Video av hendingini sæst á tv2.no VIÐ AT TRÝSTA HER
Tað er føroyska reiðaríið, Sekstant, ið eigur sandbátin, Skansanes, sum fríggjadagin beint áðrenn klokan 13 rendi á land í Storfjorden sunnan fyri Aalesund í Noregi.
- Skiparin var sovnaður, og so rendi báturin á land, sigur reiðarin, Emil Gert Nielsen.
Hann sigur, at tað bert var kúlustevnið, ið fekk nakað av skaða.
- Báturin verður kannaður í løtuni, og so verður skaðin gjørdur aftur, sigur Emil Gert Nielsen.
Hann harmast um hendingina, hóast skaðin var rættiliga lítil.
- Tað er so nógv og góð útgerð umborð, at sovorðið eigur ikki at koma fyri, sigur reiðarin, Emil Gert Nielsen.
