Kringvarpið sigur umskylda

Tað var ímóti endanum á út­varps­tíðindunum hjá Kring­varpinum á miðdegi í gjár, at upp­lesarin las upp eina um­bering, sum segði, at »Kring­varp Føroya ásannar, at Kring­varpið fór út um markið fyri góðan fjølmiðlasið í einum inn­slagi um avtalað spæl millum NSÍ og B36, sum var sent í út­varps­tíðindunum tann 14. oktober 2011 klokkan 12.20.«
Víðari verður sagt í um­ber­ingini, at »innslagið um av­talað spæl var ikki gjørt á nøkt­andi keldugrundarlagi. Ítróttar­fel­øgini, sum vóru fyri skuld­set­ingum, fingu harumframt ikki møguleika at svara aftur. Kring­varpið biður B36, NSÍ og lurt­arar um umbering.«
Talan var um eitt heilt marg­háttligt innslag, ið útvarpið hjá Kringvarpinum nú sigur umskylda fyri, næstan tveir mánaðir seinni, tí innslagið fevndi mestsum bara um git­ingar og so at siga ongar sum helst faktiskar upplýsingar.
Innslagið hjá útvarpinum, ið Sigmar Bláberg hevði gjørt, byrjaði soleiðis: »Tíðindi ganga um, at NSÍ ætlar at lata B36 vinna dystin sunnudagin, so NSÍ sleppur upp í europeisku kapp­ingina, sum gevur nógvar pengar. FSF umrøður málið í løtuni.«
Hóast øllum stóð greitt, at NSÍ neyvan fór grátandi av vøll­inum, um B36 vann júst henda dystin og gjørdist føroya­meistari, so var alt tos um avtalað spæl púrasta burtur­við. Men at leggja tvey feløg undir avtalað spæl er ein álvar­slig skuldseting – ikki minst, tá hvørki av feløgunum verður spurt…
Longu sama dag, sum henda íspunna søgan hevði verið í útvarpinum hjá Kring­varp­inum, gjørdu bæði NSÍ og B36 vart við seg og mótmæltu, men umberingin er eftir øllum at døma blivin viðgjørd sera væl í Kringvarpinum, nú tað tók næstan tveir mánaðir at avgreiða hana. Umberingin er ikki at finna á heimasíðuni hjá Kring­varpinum, hóast søgan frá innslagnum eisini stóð har í eina løtu, men bleiv strikað seinni henda fríggjadagin í oktober.