Arbeiðið at flyta alt Kringvarpið niðan í Sortudíki fer at ávirka sjónvarpsskránna í summar. Eitt nú fer Dagur og Vika í summarferiu, og sjónvarpstíðindasendingin verður ikki á skránni í juli og tvær vikur í august.
Hesum boðar Kringvarpið nú frá.
- Tað er sjálvandi harmiligt, at Kringvarpið hevur so langan steðg við sjónvarpstíðindum, men vit vóna, at hyggjararnir bera yvir við okkum. Tøkniliga útgerðin hjá sjónvarpinum í Vørðsluni skal takast niður og setast upp aftur í Kringvarpshúsinum í Sortudíki, og hetta er eitt stórt arbeiði, sigur Dia Midjord, stjóri í Kringvarpinum.
Nýggj sjónvarpsstova verður innrættað í einari av teimum størru útvarpsstovunum. Eftir ætlan verður arbeiðið liðugt í september. Bygningarnir í M.A.Winthersgøtu eru seldir, og sjónvarpið skal flyta út í summar. Í hesum sambandi er neyðugt at gera eina fyribils sjónvarpsstovu, haðani vit senda Dag og Viku, til nýggja sjónvarps-stovan er klár í heyst.
