Dávur Winther
Nykurin í Fuglafirði
Í Fuglafirði hevði Frits Johannesen skrivað ein sjáldsama góðan leik við støði í søguni um Nykin, sum vit kenna hana. Við hepnum hugflogi hevur hann í hesum leiki funnið fram staðarnøvn og nøvn á persónum úr grannaumhvørvinum í Fuglafirði. Hetta er ein sangleikur, sum tónleikaliga er framúr.
– Men mest og best av øllum er, at hann er framførdur av einum 6. flokki! Og tey leika øll og syngja øll, sum høvdu tey ikki gjørt annað – Tó eru tey reinir amatørar. Júst her liggur frambrotið! Men tað tykist øðrum óinteressant...
Málsliga hevur leikurin dygd uttan tó at vera stívur í framførsluni av so ungum næmingum.
Í stuttum sagt hava vit her eitt leikkonsept við leiki og sangi av 6. floksnæmingum, sum má sigast at vera hendinga heppið á mentanarliga pallinum.
Hetta er ein fongur fyri restina av lívinum hjá hesum børnum at hava verið við til og, um rætt var atborið, so eisini fyri Fuglafjarðar Skúla – Frits hevur fingið góða hjálp frá Eyð Matras og Marjun Djurhuus at seta leikin upp og Róa Eliasen klaver, Tórhalla Justinussen gittar og Jónsvein Poulsen bass - Alt dygdar arbeiði!
Ein forkunnug listaframsýning lat eisini upp í Fuglafirði.
Men heldur tú at “Mentanartíðindini” í Kringvarpi Føroya tímdu at taka hetta upp á tungu?? – Nei, so eiðasørt!
Torradagar í Klaksvík
Í Klaksvík høvdu tey eina heila viku, sum bleiv kallað Torravikan. Aðrastaðni er greitt frá, hvat hetta merkir, so tað skal eg ikki koma inn á her. Men tað er skjótt at koma eftir, at størsti partur av hesi viku hevði nógv við mentan at gera – so sum vit her norðuri eisini skilja mentan.
Ein sera fjøltáttað og rúgvusmikil skrá – í eina heila vika!
Men heldur tú, at “Mentanartíðindini” í Kringvarpi Føroya tímdu at taka hetta upp á tungu?? – Nei, so eiðasørt!
“Mentanartíðindini” 2. mars
Hvat var so í “Mentanartíðindunum” 2. mars?
5 min. við tungmálmstónleikabólkinum SIC, ið greiddu frá virki sínum. Men mær kunnugt sleppur drotningin ikki at roykja í al-menna rúminum. Eisini tingið og tingmenn hava tikið henda skilagóða tátt upp. Í innslagnum við SIC varð ein spurdur, meðan fýra royktu upp á skift. So nógv, at tað líktist meir Smyril í toku. Av somu grund fekk eg ov lítið við, hvat sagt varð.
5 min. við leikinum um Maxim Gorkij
5 min. við Rithøvundafelagnum
2 min. við mótasýning
Í sjónvarpshøpi eru 5 min nógv sum innslag – Haldi, at “Mentanrtíðindini” kundu unt Nykinum í Fuglafirði 2 min. Somuleiðis hevði tað ikki verið ov nógv, um tey brúktu aðrar 2 min. upp á eina heila viku úr Klaksvík við mentan – Torradagarnir.
Men kanska er hesin partur av fiskivinuni ikki mentan??
Kringvarpsgjaldið
Eftir hesa viðferðina, sum tíverri ikki er tann fyrsta av slagnum, havi eg hug at halda, at kringvarpsgjaldið kundi verðið heintað frá havnarfólki, meðan vit ómentaðu fingu somu upphædd í stuðuli fyri at hyggja eftir Havnartíðindum og annars mentanartíðindum úr Havn. Á henda hátt kundu vit kanska blivið eitt sindur mentaði her norðuri í myrkrinum.
Og tá ið vit eru so býtt at reagera upp á hjálparloysið úr høvuðsstaðnum, so verða vit kallaðir lokalir!
Lokalir – vit gera bert vart við, at nakað hendir norðan fyri Tórgarð, sum kanska ein suðuroyingur ella heimasandsmaður kundi havt áhuga í. Men hann fær tað ikki at vita – tí Mentanratíðindini hjá Public service statión Føroya skilir ikki, ella ger sær ikki far um, hvat sker uttan fyri eingj-agarðarnar.
Tó skal “Góðan Morgun Føroyar”, sum fekk ákoyringar herfyri, fyri ikki at vera nóg seriøs sending í eini Public service støð, hava rós fyri at hava víst Torradøgunum góðan ans!
Hetta er kanska alt afturundirgerð í kjalarvørrinum av miðsavningar-rákinum, sum land okkara er fyri í dag.
Til kunnleika sigst virka og vinna o.u. 160 fólk í saml-aða fjølmiðlaheiminum í Tórshavn. Haldi, at í Klaksvík virka eini 3 ella 4 innan hetta sama yrkið.
Tí kundi kanska ein partur av miðlaheiminum ella Kringvarpinum verðið fluttur til Klaksvíkar, nú tað er vorðið “in” at flyta stovnar.
Ikki tí, vit hava tað gott - og tað hendir nógv her norðuri!
