Gjáramorgunin fór ein bilur út av í Gøtudali. Løgreglan fekk eina fráboðan um hendingina, og her vísti tað seg, at bilførarin var ávirkaður av rúsdrekka.
- Her var eingin persónsskaði og lítil materiellur skaði. Bilførarin verður skuldsettur fyri rúsdrekkakoyring, visti vaktleiðarin á løgreglustøðini at siga í morgun.
Løgreglan sigur, at tað annars var stak friðarligt í nátt, og nú sæst tað eisini aftur á býarlívinum, at tey nógvu jólaborðini eru løgd afturum.
- Seinastu dagarnar hava nógv ferðsluátøk verið kring um landið, og í allar flestu førum - fyri ikki at siga í øllum - hevur alt verið eftir bókini.
Vaktleiðarin segði seg í morgun ikki hava neyvu uppgerðina yvir hesi ferðsluátøk við hondina, men sum heild hevur lítið og einki verið at funnist at.
