Seint seinnapartin gjørdist tað greitt, at føroyska manslandsliðið í hondbólti kom í EM-undankappingarbólk við Eysturríki, Rumenia og Ukraina.
EM-endaspælið verður spælt í Týsklandi 10. til 28. januar í 2024.
Eftir tí sum tey hondbóltskønu siga, so er Eysturríki úr styrkisbólki 1 og Ukraina úr styrkisbólki 2 góð lutakøst, meðan Rumenia úr styrkisbólki 3 er eitt minni gott lutakast.
14. mars í fjør taptu Føroyar sera tepurt 25-26 fyri Ukraina í høllini á Hálsi í Havn. Tá var eisini talan um ein EM-undankappingardyst.
Enn fyriliggur dystarskráin ikki, men tað er greitt, at fyrsti undankappingardysturin í okkara bólki, ið er bólkur 4 skal spælast 12. oktober.
