Vit hava sæð fyrr, at kommunan hevur hongt bannarar upp, har eitt nú verður boðið vælkomin til ólavsøku ella umhvørvisviku. Men at Tórshavnar kommuna nú fór at selja handilslýsingar á lyktapelum, tað tykist óhoyrt, serliga tá kommunan hevur verið so nógv eftir handilsrekandi, sum seta upp lýsingarskelti.
Men talan er um eitt mistak, sigur Ingibjørg Berg, kommunustjóri í Havn, tá Sosialurin spyr, hvussu nógv tað kostar at lýsa á hesum plássum.
– Í hesum einstaka førinum tekur kommunan 2.012,50 krónur við mvg fyri upphang, men talan er sum sagt um eitt mistak, og tí er annar prísur heldur iki settur á fyri at lýsa, sigur kommunustjórin.
Spurd um, hvussu hetta sampakkar við ferðslutrygdarpolitikkin hjá kommununi, og um ferðslumyndugleikar so sum politi o. o. hava viðmælt hesum hátti at selja lýsingarpláss sigur Ingibjørg Berg aftur, at talan er ikk um lýsingarpláss, og tískil hava ferðslumyndugleikarnir ikki ummælt hetta tiltakið.
Sambært kommunustjóranum, ser er tað ein »stovnur«, sum hevur gjørt mistakið við at hava fingið bannarar at heingja upp.
Tað er brandstøðin, sum hevur hongt bannarar upp og sent rokning fyri ómakin.
Rokningin er upp á 1.610 krónur pluss mvg. Tað er tað sama sum 146 krónur um dagin.
