Amerikansku eigararnir hjá Liverpool spilla ikki tíðina. Sunnudagin var Brendan Rodgers sendur til hús, eftir at úrslitini ikki hava gingið heilt eftir vild seinastu tíðina, og skjótt bórust tíðindini um, at FSG vóru í samrøðu við Jurgen Klopp um at taka yvir.
Skjótt hevur gingið og í dag boða bretskir miðlar frá, at týskarin fer at skriva undir sáttmála við enska stórfelagið seinni í dag, og verður almannakunngjørdur sum venjari á tíðindafundi í morgin. Sáttmálin er væntandi galdandi hetta kappingarárið og trý afturat.
Jurgen Klopp var venjari hjá Borussia Dortsmund inn til mai í ár. Tey sjey árini, hann var venjari hjá Dortmund, vann hann týsku landskappingina tvær ferðir, umframt at hann førdi liðið í finaluna í Champions League finaluni eina ferð.
Hann tekur væntandi bosniska Zeljko Buvac og týska Peter Krawiets, sum báðir vóru venjarar saman við honum í Borussia Dortsmund, við sær til Liverpool. Hetta merkir at Sean O'Driscoll og Gary McAllister, sum vóru settir í starv í Liverpool FC í summar, vera uppsagdir. Tó siga leysasøgurnar, at Gary McAllister, ið er fyrrverandi Liverpool-leikari, er boðin eitt starv sum ungdómsvenjari hjá felagnum.
