Hóast vit liva tætt knýtt at fiskivinnuni, eiga vit at bjóða okkum breiðari fram, eitt nú at økja um útbúgvingarmøguleikarnar og harvið fáa eitt meiri fjøltáttað og breiðari samansett fólkagrundarlag. Hetta verður í nógv størri mun uppgávan hjá komandi býráði
Í Klaksvík hava vit góðar og vælvirkandi skúlar so sum Húsarhaldsskúla Føroya, Vevskúlan, Handarbeiðsskúlan, Sjónám, HF-skeiðið og Tekniska Skúla. Við hesum skúlum, hava vit møguleika at skapa eitt kraftsentur, sum brúk er fyri innan útbúgving og mentan.
Bústaðarmøguleikar til hesi lesandi tørva vit í stóran mun, og má herðsla nú leggjast á at fáa hetta til vega. Tíverri hómast ikki nøkur verulig loysn í løtuni. Latið okkum í felag virka fyri at bøta um hesa álvarsligu avbjóðing.
Fyrr í ár bórust góðu tíðindini um at Húsarhaldsskúli Føroya fer undir nýbygging og fær tískil meiri hóskandi hølir í miðbýnum, har bústaður til næmingarnar verður ein partur av skúlanum.
Samskipaðar
útbúgvingar
Havi fyrr verið frammi við, at skapa ein skúladepil. Tað er ein stór, men neyðug ætlan, at samansjóða hesi ymisku skúlatilboðini, sum longu eru í útboði í Klaksvík. Skúlarnir eru ymiskir og virka undir ymiskum treytum, við ymiskum leiðslum og formi. Tí má samráðast um eitt felags stev, sum kann verða byrjanin til ein sterkan skúla- og mentanardepil.
Við at savna orkuna hevði "synergieffektin" gjørt, at vit høvdu fingið eitt sterkari og meiri áhugavert umhvørvi fyri unga ættarliðið, næmingarnar og lærararnar. Hetta fer at seta størri fokus á Klaksvík og skapa stórar menningarmøguleikar.
Tíðin er búgvin til at býráðið og skúla- og landsmyndugleikar seta seg saman at leggja eina ætlan um menning av skúlatilboðum í Klaksvík.
Kollegiebygging
neyðug
Ein fortreyt fyri at fólk skulu flyta higar er, at vit kunnu hýsa teimum. Tí er alneyðugt at fara í gongd við kollegiebygging til okkara næmingar, næmingar aðrastaðni úr Føroyum og úr útlandinum.
Øll byrjan er tung, men um vit hyggja aftur á “idealistiska” arbeiðið, sum er framt innan skúlaøkið í Klaksvík, sum kommuna og land hava tikið undir við, kann hetta geva okkum nógv í framtíðini.
Latið okkum nú standa saman og fáa sett sjøtul á hetta arbeiði. – Eg eri tilreiðar!
Gunvá við Keldu
Býráðslimur í Klaksvíkar Býráði
og valevni Fólkafloksins
