“Øll hava rætt til góð barnaár” veitir nú dulnevnda ráðgeving umvegis kjatt á heimasíðuni hjá Bláakrossi.
– Kjattið er ætlað børnum og ungum, sum vaksa upp í heimum, har rúsur er ein trupulleiki. Foreldur og onnur rundan um hesi børn og ung, kunnu tó eisini venda sær til okkara umvegis kjattið. Tey, sum svara á kjattinum, eru starvsfólk og bólkaleiðarar hjá “Øll hava rætt til góð barnaár. Hesi eru millum annað sálarfrøðingar, familjuterapeutar og námsfrøðingar, sigur Alisa Hammer, leiðari á fyribyrgingardeildini hjá Bláa Krossi Føroya.
"Øll hava rætt til góð barnaár" veitir ikki rúsviðgerð í sjálvum sær, men er ætlað at hjálpa teimum børnum og ungum, ið eru ávirkað av rúsdrekka og rúsevnum.
Frammanundan er tilboðið eisini skipað sum bólkaráðgeving, har børn og ung koma í bólk við øðrum børnum og ungum, ið hava somu avbjóðingar.
– Vit leggja dent á, at ráðgevingin er dulnevnd og tað merkir, at vit vita ikki hvør skrivar ella hvar viðkomandi er staddur, sigur Alisa Hammer um nýggju kjattfunkuna.
– Onki av tí, sum verður skriva verður goymt hjá okkum. Ynskir ein at gevast við at skriva, kann man altíð gera tað. Samrøðurnar kunnu vera so langar, sum ein ynskir, innanfyri upplatingartíðirnar á kjattinum. Til ber, at kjatta við okkum um júst tað, sum ein gongur og hugsar um – eisini um tað ikki hevur við rústrupulleikarnar heima at gera, sigur Alisa Hammer.
