KÍ vann í dag stórsteypadystin í kvinnufótbólti. Mótstøðuliðið var NSÍ, sum í fjør vann greipuna – bæði FM heitið og steypakappingina.
Intensiteturin var góður, spælararnir kendust at vera í hampiliga góðari venjingarstøðu, og í løtum var fótbóltsspælið gott.
KÍ hevði leingi beri tak á spælinum, men NSÍ var vandamikið, tá ið tað eydnaðist at leggja bóltin fram til Heidi Sevdal, og tað var eftir framlegging í høgru, at Heidi Sevdal rann frá verjuni og við skoti flatt í handara síðunetið skoraði.
At NSÍ var frammanfyri 1-0 bar við sær, at tær gulu og svørtu eina løtu høvdu tak á spælinum, men so var tað, at KÍ javnaði til 1-1. Málið skoraði Durita Hummeland, sum størsta partin av tíðini var framrættað í vinstru. Úr spískum í vinstru smekkaði hon til, og bólturin sigldi omanfyri Rannvá við Streym í NSÍ málinum og í handara síðunetið.
Eftir útjavnandi málið fekk KÍ av álvara aftur um endan, og tá eydnaðist tað at skora sigursmálið.
NSÍ misti í uppspælinum, bólturin varð spældur mitt fyri til Eyðvør Klakstein, sum av brotsteigarmarkinum og umvegis ein mótstøðuspælara sendi bóltin í málið.
