Plúmm uttan síðsta Mið. Magnus er ikki við í júst hesi samansetingini, men ein nýggj trio hevur sæð dagsins ljós. Leivur Thomsen, Arnold Ludvig og Rógvi á Rógvu, allir við rót í Plúmm, hava stovnað nýggja jazztrio, sum verður at hoyra á Café Kheops annaðhvørt vikuskifti.
Keopps verður jazzmiðdepil í Havn. Veteranarnir í hesi nýggju trio seta hol á fríggjakvøldið 4. november og spæla ætlandi annaðhvørt vikuskifti.
At hesir duga sítt kramm er óneyðugt at fara at brúka blaðrúmd til her, men við sær í nýggju samansetingina hava teir hvør í sínum lag nýggj og spennandi tónleikaverk.
Men vikuskiftini ímillum verða heldur ikki keðilig. Yngri og evnarík nøvn eru á lepanum. Fríggjadagin eftir, 11. november, er ungur og evnaríkur maður á skránni. Ein ungur harri, ið er á veg fram. 17 ára gamli Benjamin Petersen fer á pallin og við sær hevur hann tveir aðrar blásarar, nevniliga Trónd Olsen og Dáva Juul Magnussen.
Øll sløg
Rópini um spælistað, ella støð, hava longi ljómað í Havn. Nú er so ein pallur komin til jazzin.
Keopps verður ætlandi nýggjur jazzdepil í Havn og talan verður um allan jazz, alt frá standard til latin og tað, sum er harímillum. Eisini guitarúrmælingurin á spanskan guitar, Ragnar, ið er tónleikalærari, verður at hoyra regluliga á Kheops.
Eitt stað við livandi tónleiki, har blaðað verður upp á jazz í gomlum sum nýggjum nótaørkum og har talan er um allan jazz, kanska eisini tað slagið av jazzi, ið ikki er fest á blað, tí hann er enn er ov livandi.
Ein livandi pallur, har nýggj og eldri, roynd nøvn skiftast at føra fram.
Fløga
Um eitt hálvt ár, ella so, fara Rógvi, Arnold og Leivur í upptøkuhølini at taka upp fyrstu fløguna, ið henda nýggja jazztrio spælir inn.
Tá fløgan er komin á marknaðin einaferð í vár, er ætlanin at fara á ymsar festivalar í útlondum at spæla.
Jú, hóast síðsti Plúmmarin, Leivur, júst er komin aftur á klettarnar, eftir at teir allir hava verið burtur í útlegd longri og styttri, so tykist, sum kennist "J" bókstavurin í orðinum Jazz ikki sum eitt akker, ið bindur teir niður. Heldur er hetta tað, ið heldur teir á felags grund, men sum hevur nóg langa ketu, so tað hevur loyvt teimum at royna seg í longri áramál á øðrum beitum, men altíð finna teir heimaftur og saman.
Í vár, tá fløgan er komin, fara teir ætlandi í felag at vitja útlendskar festivalar og at hoyra, hvat teir hava at bjóða. Og ikki minst vísa, hvat føroyskur jazzur hevur til kræsin oyru.
Føroyskir lurtarar hava tó møguleikan í vetur at hoyra nýgju jazzsamansetingina og fyrstuferð verður á Keopps 4. november.
