Nú eru tónleikararnir í Kashmir komnir til Føroya í øllum góðum. Bólkur skal hava framførslu í Mentanarhúsinum í Fuglafirði í kvøld.
Í løtuni er bólkurin í Tórshavn, men seinnapartin gongur leiðin til Fuglafjarðar, har teir skulu gera ljóðroyndir og gera klárt til at
spæla konsertina kl. 21.00.
Forsangarin í Kashmir, Kasper Eistrup, er sera fegin um at sleppa til Føroya aftur at spæla og sigur seg minnast fleiri góðar løtur, frá tá
teir seinast vóru í Føroyum, í samband við G! Festivalin í 2004.
Hann lovar, at konsertin í kvøld verður við fullum útblástri, og ætla teir at spæla í hvussu so er í 90-100 minuttir.
Teir fara at spæla sangir av nýggju fløguni og eisini nógv av tí gamla.
Kashmir góvu nýggja fløgu út tann 18. Mars, ið kallast E.A.R., og í hesum sambandi hava teir verið á Europeiskari Konsertferð. Teir skuldu byrja konsertferðina tann 23. Mars í Falconer Salen í Keypmannahavn, men konsertin var útseld eftir stutta tíð, og tískil var eykakonsert tann 22. Mars. Hareftir skuldu teir spæla í Aarhus Musikhus tann 4. apríl, men her máttu teir eisini seta eina eykakonsert dagin fyri, t.v.s. tann 3. apríl.
Tann 5. Apríl var tann seinasta konsertin hjá Kashmir í Danmark, har teir spældu í Aalborg Kultur- & Kongrescenter, síðani gekk leiðin til Hamburg, Nijmegen, Amsterdam, Cologne, Bruxelles, Zurich, Munchen, Wien, Berlin, Oslo, Helsinki, Stockholm, Malmø og til seinast verður konsertin í Fuglafirði fríggjakvøldið tann 17. mei kl. 21.00.
Konsertin í Mentanarhúsinum er tann seinasta, áðrenn teir fara at spæla á ymsum festivalum kring Europa.
