Tað gongur skjótt fyri seg. Kemur tú ov seint í høllina, so er vandi fyri at tú einki fær við. Tað er sjáldan at brúk er fyri fyri fjórða og fimta settinum. Til tað eru kvinnurnar hjá Mjølni alt ov góðar. Tær eru einaráðani í Eik liguni í løtuni, og mangan er mótstøðan ov lítil.
- Okkum nýtist ikki at spíla okkum út til flestu dystirnar. Tað er ikki beinleiðis óáhugavert at spæla, tí so brúka vit teir dystirnar til at royna nøkur ting, sum vit skulu brúka til teir meiri spennandi dystirnar, sigur Eina Kalsø, sum illa nokk fekk sveittan á pannua sunnudagin í Badminton høllini í Klaksvík.
Unga TB liðið er á vitjan og Kristian Mikkelsen er í holt við at byggja upp av nýggjum. Men í løtuni hevur hvíta og svarta liðið av Tvøroyri ongan møguleika at kappast við sigursvandu kvinnurnar hjá Mjølni.
Dysturin er bara nakrar minuttir gamal tá órógv kemur í. Marjun Kalsø, spælandi venjari hjá Mjølni, tosar við dómarar og dómaraborðið. Okkurt er ikki sum tað skal verða. Støðan er 4-0 til Mjølnir, men við eitt verða øll stigini tikin frá heimaliðnum og TB fær bóltin og eitt stig.
- Tað er gali við uppstillingini hjá okkum, sigur Marjun Kalsø.
Hon er sjálv við til at gera vart við feilin. Tað kann tykjast eitt sindur løgið, at ein venjari skal vísa á ein feil, sum kostar sínum liðið fleiri stig.
- Reglugerðin sigur, at tú missur øll stigini frá tí tú stillar skeivt upp, greiður Marjun frá. Sostatt hevði Mjølnir mist øll stigini tá dómararnir høvdu funnið út av feilinum. Tí kundi Marjun akkurát tað sama gera vart við feilin beinanvegin.
Ov ójavnt
Støðan lýsir eisini eitt sindur støðuna hjá Mjølni. Ongin av spælarunum hjá Mjølni gjørdi stórvegis hóvasták burtur úr hendingini og hildu bara fram at spæla. Tær enda við at vinna settið heili 25 – 8.
- Ja, tað er lítið hugaligt at verða venjari í hesum førinum, tí eg vil altíð stremba eftir at gera alt perfekt. Í dag gera vit eitt nú fleiri feilir í servuni og tað er tekn upp á, at vit kunnu gera tað nógv betri, sigur Marjun Kalsø um vantandi mótstøðuna.
- Vit spæla betri móti teimum betri liðnum. Vit spældu væl móti Fleyr og vunnu tær greiðari enn vit kanska vinna á hinum liðnum, tí vit eru uppsettar. Men tann dagurin tá vit ikki raka dagin kann koma hvørja løtu, og tað kann verða í steypafinaluni. Og tað kemur av, at vit ov oftandi ikki skulu geva okkum í einum dysti, greiður Eina Kalsø frá.
Báðar kundu tær hugsa sær, at kappingin var deild í tvey. Soleiðis at øll liðini møtast í fyrru hálvu, men at fýra tey fremstu fara í ein meistarabólk fyri seg til seinnu hálvu, so talan verður um fleiri javnar dystir.
Tað er tó ikki óhugsandi, at kappingin verður væl javnari komandi árini. Flestu av liðnum eru í holt við at byggja upp, men Mjølnir tykist toppa fyri tíðina. Men tað er líkt til, at fleiri at berandi kreftinum á liðnum fara av landinum komandi tíðna. Umframt Einu sjálva, so er talan um Sofíu Purkhús og Birgit Guttesen, sum møguliga ikki verða at síggja í føroyskum flogbólti komandi kappingarár.
Bæði Marjun og Eina leggja dent á, at Flogbóltssambandið ger eitt gott arbeiði við at hava lið við til EM undankappingar, tryggja luttøku á Oyggjaleikunum og hava undgómslandslið, men at tær sakna fleiri avbjóðingar. Ein møguleiki kundi verið, at vinnarin í føroysku kappingin sleppur at luttaka í DM kapping Danmark, heldur Marjun fyri.
ÍF liðið hjá monnum kendu seg noyddar at fara til Íslands í farnu viku, fyri at fyrireika seg til steypafinalurnar komandi vikuskiftið, tí mótstøðan er ov lítið fjølbroytt og ov lítil.
Leygardagin verða finalurnar í steypakappingini hjá bæði kvinnum og monnum. Hjá kvinnum er dysturin millum Mjølnir og SÍ. Hetta er ein dystur, sum kann blíva javnur og spennandi í mun til nógvar av landskappingardystunum.
- Tað kann gott verða, at vit hava vunnið 3-0 á SÍ í ár, men tað var ein javnur dystur. Tær hava eisini styrkt seg, so tað verður ein spennandi finala, siga tær báðar Marjun og Eina at enda.
Hjá monnum er finalan millum SÍ og ÍF.
trondur@sosialurin.fo
Eik Ligan kvinnur:
SÍ – Dráttur 3-0(25-8, 25-13, 25-13)
Ternan – ÍF 3-0 (25-15, 25-13, 25-18)
Mjølnir – TB 3-0 (25-8, 25-17, 25-16)
Fleyr – KÍF 3-0 (25-19, 25-12, 25-13)
Støðan Dystir Sett *
Lið leiktir vunnir taptir vunnin tapt munur Stig
Mjølnir 17 17 0 51 2 49 30
SÍ 17 14 3 45 10 35 26
Fleyr 17 12 5 40 20 20 23
TB 17 11 6 34 25 9 17
Ternan 17 6 11 24 37 -13 12
Dráttur 17 5 12 20 38 -18 8
KÍF 17 3 14 13 45 -32 5
ÍF 17 0 17 1 51 -50 0
Eik Ligan menn:
ÍF – Fleyr 3-0 (25-18, 25-16, 25-17)
SÍ – Mjølnir
Støðan Dystir Sett *
Lið leiktir vunnir taptir vunnin tapt munur Stig
ÍF 15 15 0 45 4 41 27
SÍ 14 8 6 27 23 4 12
Fleyr 14 5 9 20 27 -7 9
Mjølnir 13 0 13 1 39 -38 0
