Herfyri var havrannsóknarskipið Jákup Sverri á Føroyabanka og gjørdi regluligar váryvirlitstrolingar.
Men, hetta gjørdist ein stuttur túrur hjá skipinum hesaferð.
- Ringt veður hevði við sær, at váryvirlitstrolingin á Føroyabanka bleiv nakað stutt, og einans 9 av 29 trolstøðum vórðu kannaðar.
Tað siga tey á Havsstovuni, sum nú hava lagt eina túragrágreiðing út á sína heimasíðu.
- Mest varð fingið av hýsu, og meginparturin av hýsuni var millum 40 og 50 sentimetrar.
Um toskin verður í stuttum sagt soleiðis:
- Nøgdin av toski er á sama støði sum síðstu árini, tó varð nakað meira fingið av smærra toskinum í mun til síðstu árini annars.
Á Havstovuni siga tey, at bæði toskur og hýsa eru rakari, enn tey hava verið síðstu árini.
Heldur lítið av føði varð eisini staðfest í magakanningunum.
- Hetta gevur ábendingar um, at tað er minni av føði hjá fiskinum á Bankanum í løtuni.
Á Havstovuni vísa tey á, at av tí, at so fáar støðir vórðu tiknar á túrinum, eru úrslitini frá túrinum í ár nakað óviss.
- Tó varð alt gýtingarøkið hjá toski kannað, og tí eru úrslitini fyri tosk meira eftirfarandi enn eitt nú fyri hýsu.
Lagt verður aftrat, at toskur vanliga er savnaður á grynsta partinum av Føroyabanka um várið, meðan hýsan er meira spjadd um Bankan.
Øll túrafrágreiðingin kann lesast um heimasíðuna hjá Havstovuni.
