Í farna kappingarári fekk Tottenham eina nýggja superstjørnu. Harry Kane, ið byrjaði kappingarárið sum ein ungur eykaleikari, sum hevur verið útleigaður til nógv smærri feløg, tók øll á bóli og endaði við at skora heili 31 mál fyri felagið, sum hann hevur umboðað, síðani hann var 11 ára gamal. Mongu málini gjørdu tað til eina sjálvfylgju, at Kane eisini varð úttikin á enska landsliðið. Av tí sama eru onnur feløg eisini vorðin áhugað í unga, bretska málslúkinum.
- Eg eri glaður í Spurs (eyknevni fyri Tottenham), og framtíð mín verður eisini í hesum felagnum. Eg veit, at onnur feløg eru áhugað, og tað er sjálvandi smikrandi. Men Tottenham er eitt stórt felag, og eg ætli mær at vera verandi í hesum stóra felagnum, sigur Harry Kane, sambært Manchester Evening News.
Seinastu vikurnar hava bretskir miðlar viljað verið við, at tað serliga er Manchester United, ið vil hava Kane at skora mál fyri teirra felag.
