Flaggrøðuna í ár heldur Kalpana Vijayavarathan, Ph.D og adjunktur á Fróskaparsetrinum, har hon undirvísir í enskum sum fremmandamál.
Kalpana er 59 ára gomul, er upprunaliga ættað úr Madras í India og hevur búð í Føroyum síðani 1991.
Flaggdagshaldið byrjar kl. 15, tá skrúðgonga við hornorkestri og skótum fer frá Finsensgarðinum yvir í Niels Finsensgøtu og oman á Vaglið, har Havnar Hornorkestur spælir, og flaggrøðan verður hildin.
Flaggdagshald var hildið í Havn í 1941 og 1942, men síðani var steðgur í nøkur ár.
Havnar Hornorkestur byrjaði síni flaggdagshald í 1947 og hevur síðani tá skipað fyri flaggdagshaldi á Vaglinum í Havn.
- Flaggdagshaldið er serstakt í ár, tí hornorkestrið hevur skipað fyri flaggdagshaldið í 75 ár, sigur Rebekka Hjørleivsdóttir, forkvinna í Havnar Hornorkestri.
- Flaggdagurin er hátíðardagur, tá býrin er flaggskrýddur, og vit vóna at síggja nógv fólk koma saman á Vaglinum, at heiðra og at savnast um Merkið, sigur forkvinnan.
