KÍ spælir um eina viku undanumfar í Europa League. Mótstøðuliðið er Birkirkara av Malta, og fyrri dysturin verður spældur á útivølli.
Sambært oddsum hjá veddingarfyritøkum, so er KÍ undirmett til tann fyrra dystin. Veddingarfyritøkurnar halda, at Birkirkara hevur 50% møguleika at vinna dystin. Sannlíkindini fyri javnleiki eru 27%, og sannlíkindini fyri KÍ-sigri eru 23%.
Birkirkara, sum bleiv nummar fýra í heimligu kappingini síðsta kappingarár, var ikki við í evropeiskum fótbólti í fjør, men fyrraárið vunnu teir bæði á bosniska Siroki Brijeg og skotska Hearts áðrenn russiska Krasnodar varpaði teir úr triðja umfari.
Fyrri dysturin ímillum Birkirkara og KÍ verður spældur á Malta komandi hóskvøld, 28. juni. Eina viku seinni er returdystur í Føroyum.
