Nú her í Kristi himmalsferðavikuskiftinum verður stóra felags kórstevnan hildin í Norðurlandahúsinum í Havn.
Luttakaratalið liggur um 150, og telur tað umframt bæði yngri og meira tilkomnar sangarar her í landinum eisini kórfólk úr Íslandi og úr Danmark.
Tað serstaka í ár er tað, at tveir dirigentar uttanífrá eru felags um tónlistarligu ábyrgdina:
Jón Stefánsson úr Reykjavík er vælkendur millum kórsangarar í Føroyum. Umframt tvær ferðir áður at hava verið stevnukórleiðari hevur hann eisini víst hesari okkara kórstevnusiðvenju tann áhuga við egnum kóri at vitja aftur sum stevnuluttakarar, tá annar kórleiðari hevði stevnuleiðsluna.
Kór Langholtskirkju hevur eisini verið dyggasti stuðul til stórar framførslur í Føroyum – eitt nú á minniligu Atlantsljóm-stevnuni við Requiem Verdis á skránni, har kona hansara, gitna operusongkvinnan Ólöf Kollbrún Harðardóttir var ein av solistunum. Ólöf, sum framdi megnarverk við sangfólki her í sangskúlatiltakinum fyri nøkrum árum síðan, er eisini við á hesari Føroya-vitjan.
Hin kórstevnu gestaleiðarin er Jim Daus Hjernøe, professari í rytmiskum kórsangi við Det Jyske Musikkonservarorium í Århus og Ålborg. Til tess at kveikja nýtt lív í føroyskan kórsang hevur Kórsamband Føroya skipað fyri kórleiðaraskeiðum – tvey nú her í várhálvuni og tvey somu tíðir í fjør - við hesum úrmælingi innan seriøsan rytmiskan kórsang.
Við á ferðini hesaferð hevur Jim D. Hjernøe við sær sítt gitna kór Voxnorth – 12-manna úrvalsbólkur, ið er at rokna sum ein av trimum professionellum kórum í Danmark, ið hevur gjørt vart við seg bæði innan- og uttanfyri landamark. Eyðsæð er tað tí, at hesin bólkur saman við sínum leiðara verður eitt kærkomið íkast til nýggjar leiðir í føroyskum kórvirksemi.
Endabrakið leygardagin
KÓRSTEVNAN 2011 endar leygardagin kl. 17.00 við konsert í Norðurlandahúsinum. Við tí stóra felagskórinum fer Jón Stefánsson tá at framføra úrvaldar klassiskar íslendskar og norskar kórsatsir, meðan Jim Daus Hjernøe við heilt øðrum lag fer at lata áhoyrarnar uppliva kórsang, har bæði raddarljóð og kroppsrørslur eru berandi partar.
Men umframt at fólk soleiðis fáa høvi til at uppliva, hvat ið er komið á skaftið hesar kórdagar í Havn, fara nevndu gestakór at seta sín serstak dám á konsertløtuna við framførslum hálvan tíma hvør við tí besta, tey hava at bjóða.
