Kári P. Højgaard, landsstýrismaður í innlendismálum, er bilsin av fráboðanini hjá løgmanni á Portalinum í morgun um, at útveita fleiri almennar tænastur til privat at røkja.
Í hesum sambandi verða nøkur málsøki nevnd, sum Kári P. Højgaard umsitur í landsstýrinum.
Men sjálvur veit hann einki um nakrar ætlaninir um at útveita ymsar uppgávur, sum hann umsitur, sigur hann.
Løgmaður staðfestir, at ongin avgerð er tikin um, hvørjar almennar uppgávur skulu útveitast til privat at rekast, tí tað skal fyrst útgreinast.
Men hann sigur, at eitt dømi kann vera uppgávan at halda og gera ábøtur á almenna vegakervið.
Hann nevnir eisini, at Akstovan er dømi um ein stovnur, sum tað kann vera skilagott at útveita til privat.
Alt hetta kennir Kári P. Højgaard einki til.
Hann sigur, at onki at hesum er viðgjørt í samgonguni og hann heldur tað vera løgið av løgmanni at koma við eini slíkari útsøgn her í dymbuldagavikuni.
- Skulu broytingar gera á nøkrum málsøki, sum eru umsitin í Innlendismálaráðnum, haldi eg, at tað skuldi verið eg, sum landsstýrismaður á økinum, sum boðaði frá tí, sigur Kári P. Højgaard.
Hann sigur, at møguliga kunnu onkrar uppgávur í sambandi við at røkja og bøta um vegakervið, útveitast til privat.
Men hann sær ikki fyri sær, at uppgávurnar hjá Akstovuni verða latin privatum at reka.
- Akstovan er ómetaliga bílig og tað er neyvan nakrastaðni, at tað er bíligari at sýna bilar enn í Føroyum.
- Tí er onki, sum talar fyri, at tað er bíligari at útveita Akstovuna, sigur Kári P. Højgaard.
Hann sigur, at tað eru ikki meiri enn tríggir mánaðir síðani, at røddir eisini vóru frammi um at einskilja Akstovuna, men tá varð tað afturvíst.
Og hann heldur ikki, at nakað er broytt síðani tá, sum ger, at støðan er øðrvísi nú.
