Tað kann onkuntíð vera ein avbjóðing at fáa pláss fyri øllum fløskunum av oljum, sós, ketjupp og øðrum í køliskápinum, men spurningurin er, um alt hatta veruliga skal í køliskápið yvirhøvur.
Sambært norsku matsíðuni godt.no er als ikki neyðugt at seta fleiri vørur, sum munnu standa í flestu køliskápum í landinum, í køliskápið.
Sojasósin, sum er gjørd av sojabønum, hveiti, vatni og salti, ein ein teirra. Sambært godt.no kann hon saktans standa á køksbonkinum, eisini eftir at fløskan er latin upp. Tað bilar tó ikki, um hon stendur í køliskápinum.
Olivinoljan harafturímóti, skal als ikki í køliskápið at standa. Hon skal helst standa myrkt og svalligt, og ikki í einum køliskápið, har hitin ofta sveiggjar nakað. Júst tørvurin á myrkrið er orsøkin til, at flestu olivinoljufløskur eru myrkar. Vanligur stovuhiti er betri enn køliskápið. Hitabroytingarnar ávirka smakkin og kvalitetin á oljuni. Kuldin ger harumframt, at feittsýrurnar klumpa seg saman, soleiðis at oljan gerst tjúkri. Tí eigur ein at taka hana úr køliskápinum og lata hana orna eitt sindur, áðrenn hon verður tikin í nýtslu aftur.
Honningurin skal heldur ikki í køliskápið. Í køliskápinum krystalliserar hann og gerst harður. Lat hann heldur standa í køksskápinum ella á bonkinum. Minst eisini til, at honningur aldrin gerst ov gamal.
Ketjupfløskan hinvegin, heldur sær best kølið. Fyri nøkrum árum síðani valdu flestu ketjupframleiðarar at taka haldevni úr vøruni, og tí verður í dag mælt til at seta fløskuna í køliskápið. Tað er tó ein harðbalin vøra, skrivar godt.no, so skaðin er ikki størri enn so, um hon stendur frammi. Men smakkur, litur og konsistensur heldur sær betri í køliskápinum.
Tað sama er galdandi við majonesinum. Tað kann standa frammi í upp til tvær vikur, men hetta ávirkar smakkin á majonesinum, sum í høvuðsheitum er framleitt av eggum og olju.
