Støðan hevur við sær, at arbeiðið við ætlanum fyri komandi kappingarár, bíðar, inntil býráðsvalið hevur verið. Norðlýsið sigur, at teir ikki vilja blanda politikkin og fótbóltin saman.
Tummas Lervig er formaður í KÍ. Hann er uppstillaður á javnaðarlistanum í Klaksvík.
Ein annar í ovastu leiðsluni í felagnum er Jóhan Lútzen, sum hevur ábyrgdina fyri samskifti. Hann er á tjóðveldislistanum í Klaksvík.
Karl Marius Poulsen er nevndarlimur í KÍ, og síðsta kappingarár var hann hjálparvenjari hjá Páll Guðlaugsson. Hann er uppstillaður á tjóðveldislistanum í Klaksvík.
Jóan Pauli Jacobsen var síðsta kappingarár høvuðsvenjari í ungdómsdeildini hjá KÍ. Hann er á tjóðveldislistanum í Klaksvík.
Aleksandar Djordjevic var síðsta kappingarár venjari hjá sigursvandu KÍ kvinnunum. Aleksandar er á sambandslistanum í Klaksvík.
Jákup Mikkelsen var síðsta kappingarár málverji hjá ÍF. Hann hevur boðað frá, at hann næsta kappingarár ætlar at royna seg í KÍ. Jákup er býráðslimur í Klaksvík, og hann bjóðar seg fram aftur á javnaðarlistanum í Klaksvík.
Tað er ikki at undrast á, um tey í Klaksvíkar Ítróttarfelag bíða við at taka fótbóltsligar avgerðir, inntil veljarin í Klaksvíkar kommunu týsdagin hevur talað og harvið gjørt av, um ein ella fleiri av KÍ monnunum skulu vera við til at stýra býnum.
