Í morgin 7. mai verður Jonhard Hammer, stjóri á Rás2, fjøruti ár.
Jonhard er gøtumaður, hóast hann í faðirætt er ættaður sunnan av landi og í móðurætt úr Fuglafirði. Jonhard er uppvaksin í Syðrugøtu, hevur gingið í skúla við Gøtugjógv og býr nú í Norðragøtu – arbeiðir í Havn – so hann ein so globalur gøtumaður, sum hann kann vera.
Jonhard er sonur Harald Hammer, sum er ættaður av Tvøroyri, og Sonju, sum er ættað úr Fuglafirði.
Eftir lokna skúlagongd fór Jonhard í prentaralæru hjá Stig Rasmussen á Estra. Hann hevur arbeitt sum prentari í nøkur ár, og eisini gingið á Handilsskúla á Kambsdali. Men Jonhard vildi meira og annað, enn at vera prentari.
Framíhjá hevur Jonhard fingist nógv við tónleik – fyrst og fremst við at skipa fyri konsertum og tónleikatiltøkum. Tað er ikki tann tónleikarin, hann ikki kennir, føroyskar sum útlendskar. Soleiðis var hann eisini frá byrjan partur av Summarfestivalinum í Klaksvík.
Ein dagin í 1997 kom Jonhard út í blaðhúsini hjá Sosialinum á Argjum. Hann hevði frætt, at Sosialinum tørvaði sølufólk, og hann beyð seg fram. Hann hevur dugað væl at tosa fyri seg, tí hann varð settur í starv – og hann hevur síðani starvast á Sosialinum, fyrst sum sølumaður, síðani sum marknaðarleiðari.
Tá ið Sosialurin í 2007 keypti útvarpsrásina, Rás2, varð Jonhard primus motor at fáa hesa verkætlan framda, og hann varð eisini settur sum stjóri.
Jonhard hevur sum stjóri á Rás2 verið ein profilur í føroyskum fjølmiðlum. Hann hevur eina stóra uppgávu, og hann leggur nógva orku í arbeiðið. Hann smæðist ikki at taka dystin upp við tey stóru, tað verið seg kringvarpsstjóran og hennara fylki, eins og alla ta politisku skipanina, sum heldur uppi eini - fyri privatu miðlarnar - sera órættvísari skipan.
Og fyri tíðindafólkini á redaktiónini er Jonhard ikki so galin, tí hann er tíðindafróur og hevur altíð eina góða søgu – og tað er søgunum, Miðlahúsið livir av.
Jonhard er giftur Oluffu f. Jacobsen av Glyvrum. Tey eiga børnini Sonju, sum er 10 ár og John sum er 7 ár.
