Sangarin Jon English andaðist í gjar. Hann gjørdist 66 ára gamal. Hann doyði eftir skurðviðgerð, sum hann fekk, tí ein blóðtøppur var staðfestur.
Hann var føddur í Onglandi í 1949, men við foreldrum sínum flutti hann í 1961 til Australia.
Og har fekk hann vind í seglini og er í dag ein legenda í Australia. Tað byrjaði við, at hann hevði leiklutin sum Judas í australsku útgávuni av sangleikinum Jesus Christ Superstar í 1972.
Í 1978 hevði hann ein høvuðsleiklut í australsku sendirøðini Against the
Wind og hann framførdi eisini heitislagið. Røðin gjørdist kend í fleiri londum.
Tá sjónarp hevði sínar ungu dagar í Føroyum, var henda sendirøðin at síggja, og eins og kring heimin, var hon væl dámd í Føroyum.
Og hóast English øll árini hevur sungið og framført á palli, so eru tey óivað mong, ið minnast eini 35 ár aftureftir, ið minnast English best fyri leiklutin í hesi sjónvarpsrøð og fyri frálíka temalagið.
