Skráin fyri jóansøku, sum verður á Tvøroyri í døgunum 24.-28. juni, er rættiliga rúgvusmikil og fjølbroytt.
Í skránni er nakað til øll, bæði børn, vaksin og til tey meira tilkomnu.
Lagt verður fyri longu mikukvøldið 24. juni klokkan 21, tá jóansøkubál verður á Hvítanesi við felagssangi og røðu.
Hetta tiltak verður fyriskipað í samband við, at jóansøka í ár hevur níti ár á baki.
Søguliga skipið Thorshavn, sum suðuroyingar eiga, liggur við brúnna á Hvítanesi og fer at hava opið “hús”.
Umborð á Thorshavn verður søla av kakao, kaffi, bollum - og til tey vaksnu verður eisini okkurt gott fyri tostan, sum tikið verður til í skránni.
Við tiltakið fer Jóannes Eidesgaard, fyrrverandi løgmaður og ein av stigtakarunum til Thorshavn-verkætlanina, at halda røðu.
