Næstbesta danska deildin fer um vikuskiftið av bakkastokki, har heili fýra føroyskir landsliðsleikarar skulu í dyst. Hallur Hansson skal við Vendsyssel spæla móti Skive, meðan teir tríggir føroysku landsliðsleikararnir í Vejle, skulu spæla á útivølli móti Brønshøj.
Og sambært liðskiparanum hjá Vejle, Niels Bisp, eru stór útlit fyri at Jóan Símun Edmundsson av álvara fer at fáa eitt gjøgnumbrot á liðnum hjá Vejle hetta komandi hálvárið.
Í samrøðu við bold.dk dregur liðskiparin hjá Vejle, føroyska áleyparan fram, eftir at hann hevur gjørt tað væl allan uppstartin.
- Halt eyga við okkara nýggja áleypara, Jóan Símun Edmundsson. Hann hevur víst óvanliga høgt støðið í uppstartinum. Hann dugir bæði at dribbla og at spæla upp til leikarar, umframt at avslutta sjálvur. Hann kann væl blíva ein fongur, og sær í løtuni ótrúliga skarpur út.
Hinir báðir føroysku landsliðsleikararnir í Vejle eru Viljormur Davidsen og Sonni Ragnar Nattestad. Viljormur Davidsen hevur verið fastur maður á liðnum í skjótt tvey ár, meðan Sonni Ragnar, eins og Jóan Símun, er nýggjur í Vejle.
