Tað gekk, sum tað hevur gjørt í teimum báðum róðrunum fyrr í ár, og sum tað hevur gjørt seinastu árini, tá ið 6-mannaførini við kvinnum hava kappast.
Á Vágsfirði hevði Hósvíkingur hug at bjóða av í startspurtinum, og tá var Hósvíkingur fremstur. Men so gekk tað, sum tað plagar at gera. Í miðróðrinum var tað skjótt, at Jarnbardur vann seg eina bátslongd framum, og tann munurin øktist støðugt. Í endaspurtinum var aftur í dag talan um sannan uppvísning. Hóast tær aftur og aftur vinna, so sær tað út til, at tær á Jarnbardi duga væl at seta sær nýggj mál og avrika uppaftur betur, enn tær longu hava gjørt.
Hósvíkingur tykist hava tikið patent upp á næstfremsta plássið, og Páll Fangi úr Klaksvík vann kappingina um triðja plássið greitt.
