Januarmánaði í fjør var serliga slakkur

Hóast hagtølini frá Akstovuni benda á, at vit kunnu rokna við metstórari sølu av bilum í ár, so vísir ein gjøgnumgongd av sølutølunum seinastu árini, at tað valla verður soleiðis.

Í januarmánaði í fjør vóru seldir serliga fáir persónbilar – bara 92. Mánaðin frammanundan, desember í 2014, vórðu eldir 172 persónbilar, og mánaðin eftir, í februar í 2015 vórðu seldir 160 persónbilar. Sølutølini fyrr mánaðirnar rundan um januar í fjør líkjast meira sølutølunum fyri restina av árinum.

Ikki tí, hetta bendir ikki á afturgongd – men heldur á, at bilasølan kortini er á nøkulunda sama støði, sum í fjør.

Óvist er, hvør orsøkin er til slaku bilasølutølini fyri januarmánað í fjør, men um hugt verður eftir hagtølunum niðanfyri, so sæst, at júst januar í 2015 var serliga slakkur – og tað er júst tað, sum ger útslagið, tá hagtølini fyri januarmánað í ár verða borin saman við januar í fjør.

Soleiðis var sølan av persónbilum býtt á mánaðir árini 2012-2016:

Lesið eisini:Bilasølan vaksin við 61 prosentum