Føroyski landsliðsleikarin, Jana Mittún og liðfelagarnir í Viborg spældu í dag dyst á heimavølli í bestu donsku hondbóltsdeildini móti Bjerringbro.
Tað eydnaðist Viborg at vinna dystin 30-25. Í steðginum var Viborg á odda 17-14.
Jana skoraði trý mál, legði upp til tvey mál og vann liðnum eitt brotskast. Sambært hagtølunum var hon triðeffektivasti leikarin hjá Viborg í dag.
Viborg er nummar fimm í deildini við 22 stigum, og tær liggja væl fyri at enda millum átta tey ovastu liðini, ið vinna seg í endaspælið um danska meistaraheitið.
Viborg spælir dyst aftur 6. mars aftaná landsliðssteðgin. Tá møtir Viborg greiða oddaliðnum, Team Esbjerg á útivølli.
Støðan:
| Nummar | Lið | Dystir | Stig |
|---|---|---|---|
| 1 | Team Esbjerg | 22 | 44 |
| 2 | Ikast | 22 | 40 |
| 3 | Odense | 22 | 36 |
| 4 | Nykøbing Falster | 21 | 28 |
| 5 | Viborg HK | 22 | 22 |
| 6 | Keypmannahavn | 22 | 22 |
| 7 | Silkeborg-Voel | 22 | 22 |
| 8 | SønderjyskE | 22 | 21 |
| 9 | Ringkøbing | 22 | 17 |
| 10 | Aarhus United | 22 | 16 |
| 11 | Skanderborg | 21 | 15 |
| 12 | Horsens | 21 | 13 |
| 13 | Bjerringbro | 22 | 8 |
| 14 | Ajax | 21 | 0 |
