– Hetta vita øll, segði Listbeth L. Petersen við útvarpið í gjár, í sambandi við, at hon hevur meldað seg úr Sambandsflokkinum.
Tað er nú einki nýtt, at Fólkaflokkurin stýrir, har hann er. Soleiðis hevur hann havt takið á bæði Javnaðarflokkinum og Tjóðveldinum, serliga á fíggjar- og fiskivinnuøkinum.
Men ongantíð hevur tað verið so týðuligt sum nú, hvussu Fólkaflokkurin beinleiðis stýrir einum heilum flokki, sum nú, tá Fólkaflokkuerin hevur so stórt vald á Sambandsflokkinum.
Jørgen Niclasen dugir betur enn so nógvir aðrir politikarar politiskt snildi. Hann hevur politiskt tev sum fáur – og tí er hann tikin úr leikum sum floksformaður, sum altíð hevur sum fremstu uppgávu at vinna Fólkaflokkinum ávirkan. Tað dugir hann betur enn nakar annar.
Og tað dugir Jørgen Niclasen so væl, at hann hevur tikið valdið á Kaj Leo Holm Johannesen, løgmanni, eisini.
Hendan pástand hava vit ført fram so mangan. Men eitt er, hvat miðlarnir siga. Tá nú fyrrverandi floksforkvinnan í Sambandsflokkinum sigur tað sama, so er tað kanska okkurt um snakkið...
